Jasmina Vajzović Crnac, stjórnmálafræðingur í Reykjanesbæ, gefur kost á sér í 1. sæti á lista Viðreisnar í Suðurkjördæmi fyrir komandi alþingiskosningar.
„Ég er reiðubúin að leiða lista Viðreisnar í Suðurkjördæmi og vinna með fólki að málefnum sem ég brenn fyrir á sviði mannréttinda, efnahags, atvinnulífs, jafnréttis, velferðar og menntunar,“ segir Jasmina, sem kemur upphaflega frá Bosníu og Hersegóvinu og varð flóttamaður á meðan stríðið í Bosníu stóð yfir.
„Ég flutti síðan til Íslands árið 1996 sem innflytjandi. Ég veit að mín rödd og mín persónuleg reynsla sem barn á flótta og innflytjandi frá landi með marga ólíka þjóðfélagshópa muni vera dýrmæt á Alþingi Íslendinga.“
Jasmina er stjórnmálafræðingur að mennt með diplómu í opinberri stjónsýslu. Hún er eigandi IZO ráðgjafar sem veitir ráðgjöf og fræðslu þegar kemur að innflytjendum og flóttafólki.
„Ég trúi staðfastlega á hlutverk og gildi Viðreisnar sem er Evrópusinnaður, frjálslyndur og einkaframtaks sinnaður flokkur og er fús til að leggja fram færni mína, þekkingu og eldmóð til að auka enn frekar áhrif og umfang flokksins okkar. Með því að gefa kost á mér í fyrsta sæti í Suðurkjördæmi er ég staðráðin og mjög metnaðarfull að starfa af heilindum með inngildandi og stefnumótandi sýn til að styðja við árangur flokksins,“ segir Jasmina ennfremur.