Myndlistarfélag Árnessýslu (MFÁ) verður með jólamarkað í Sandvíkursetri á Selfossi í kvöld, fimmtudagskvöld.
Markaðurinn verður opinn frá klukkan 18 til 21, strax eftir að jólaljósin hafa verið tendruð í bænum. Gengið er inn á markaðinn í sundinu, beint á móti Sundhöll Selfoss.
Á markaðnum má finna fjölbreytt úrval handverks frá félagsmönnum MFÁ. Má þar nefna listmuni, málverk, kort og gjafamerkimiða, handprjónaðar vörur, skartgripi, kransa og handgerð kerti og margt fleira.
Einstakt kvöld
Berglind Björgvinsdóttir, formaður MFÁ, hvetur fólk til að versla í heimabyggð. „Jólin snúast um hlýju, samveru og að gefa af hjarta. Með því að versla á jólamarkaði MFÁ styrkir þú ekki aðeins hæfileikaríka listamenn og handverksfólk í nærumhverfinu heldur velur líka gjafir sem bera með sér persónuleika, sögur og ástríðu. Handgerðar vörur eru einstakar – og þær gleðja bæði þann sem gefur og þann sem fær.“
„Jólamarkaðurinn er líka frábært tækifæri til að finna skemmtilega hluti sem ekki eru fáanlegir annars staðar. Þegar þú kaupir af listafólki, þá ert þú að styðja við áframhaldandi sköpun og menningu í bænum okkar – og hvað er hátíðlegra en að standa saman og styðja heimamenn í anda jólanna? Við hvetjum alla til að kíkja við, upplifa góða stemningu og finna hinar fullkomnu jólagjafir. Markaðurinn verður fullur af jólailm, hlýju og gleði – ekki missa af þessu einstaka kvöldi,“ segir Berglind lokum.
