Í síðustu viku skrifuðu Sveitarfélagið Ölfus og Jón og Margeir ehf undir verksamning um gatnagerð á fyrsta áfanga Norðurhrauns, nýs íbúðahverfis í Þorlákshöfn.
Hverfið er norðan af Norðurbyggð og Básahrauni og tengist inn að Sambyggð. Í fyrsta áfanga verða til umsóknar raðhúsalóðir en á seinni stigum verður einnig hægt að byggja einbýli í hverfinu.
Tilboð Jóns og Margeirs hljóðaði upp á tæpar 135 milljónir króna og var 89,4% af kostnaðaráætlun sem hljóðaði upp á tæplega 151 milljón króna.
Þrír aðrir verktakar buðu í verkið. GG Sigurðsson ehf bauð tæpar 142,8 milljónir króna, Aðalleið ehf rúmlega 145,3 milljónir króna og Háfell ehf tæplega 164 milljónir króna.
Framkvæmdum á að vera lokið þann 15. desember næstkomandi en lausar lóðir í hverfinu verða auglýstar fljótlega.
