Úrskurðarnefnd umhverfis- og auðlindamála hefur vísað frá kæru Skeiða- og Gnúpverjahrepps vegna virkjanaleyfis fyrir vindaflsvirkjun við Vaðöldu í Rangárþingi ytra.
Nefndin segir stjórnvöld, Skeiða- og Gnúpverjahrepp í þessu tilviki, ekki njóta heimildar til að kæra ákvarðanir annarra stjórnvalda, Rangárþings ytra í þessu tilviki, til æðra stjórnvalds.
Haraldur Þór Jónsson, oddviti Skeiða- og Gnúpverjahrepps, segir í samtali við Morgunblaðið í dag að niðurstaðan komi á óvart og valdi vonbrigðum. Að mörgu leyti sé nefndin að segja að vilji sveitarfélagið fá skorið úr málinu þurfi að gera það fyrir dómstólum. Sveitarstjórn Skeiða- og Gnúpverjahrepps muni ræða málið á næstu dögum.
Nefndin hafnaði einnig kröfu Náttúrugriða um að framkvæmdir við vegagerð og uppsetningu vinnubúða við Vaðöldu yrðu stöðvaðar á meðan kæra Náttúrugriða vegna virkjanaleyfisins væri til meðferðar hjá nefndinni.