![1](https://www.sunnlenska.is/wp-content/uploads/2023/11/1--696x426.jpg)
Félag kvenna í atvinnulífinu kallar nú eftir tilnefningum frá almenningi og atvinnulífinu sem dómnefnd mun meta og á endanum velja konur sem verða heiðraðar á Viðurkenningarhátíð FKA 2024.
Hægt er að tilnefna konur í öllum flokkum eða bara eina á heimasíðu FKA til og með 23. nóvember 2023.
Mikilvægt er að fá fjölbreyttan hóp kvenna um allt land á blað. Sérstök dómnefnd fer yfir allar tilnefningar sem berast frá almenningi og atvinnulífinu, metur og á endanum velur þær sem hljóta viðurkenningar.
FKA Viðurkenningin er veitt fyrir vel unnin störf í þágu atvinnureksturs kvenna eða þeim sem hafa verið eða er konum í atvinnulífinu sérstök hvatning og fyrirmynd.
Hvatningarviðurkenning FKA er veitt konu í atvinnulífinu fyrir athyglisvert frumkvæði eða nýjungar í atvinnurekstri.
Þakkarviðurkenning FKA er veitt konu fyrir eftirtektarvert ævistarf sem stjórnanda í atvinnulífinu.
FKA viðurkenningin var fyrst veitt árið 1999 og niðurtalning í næstu hátíð er hafin en viðurkenningarhafar næsta árs verða heiðraðar á Hótel Reykjavík Grand þann 24. janúar næstkomandi.