Atkvæði hafa verið talin í kjöri til embættis vígslubiskups í Skálholtsumdæmi. Enginn hlaut meirihluta atkvæða og verður því kosið að nýju á milli tveggja efstu frambjóðenda.
Í fyrstu umferð var kosið á milli þriggja frambjóðenda; Axels Árnasonar, Eiríks Jóhannssonar og Kristjáns Björnssonar.
Á kjörskrá voru 939 manns. Kosningaþátttaka var um 68%. Alls greiddu 642 atkvæði. Auðir seðlar voru tveir.
Atkvæði féllu þannig að sr. Axel hlaut 89 atkvæði, sr. Eiríkur 246 atkvæði og sr. Kristján 305 atkvæði.
Samkvæmt því hlaut enginn meirihluta greiddra atkvæða og verður kosið að nýju á milli þeirra tveggja sem flest atkvæði hlutu þ.e. sr. Eiríks og sr. Kristjáns.