Maður sem er grunaður um manndráp á Selfossi í lok apríl var leystur úr gæsluvarðhaldi í kvöld. Hann hefur setið í varðhaldi í átján vikur, langt umfram það sem lög almennt leyfa nema ákæra sé gefin út.
Ríkisútvarpið greinir frá þessu en lögregla gerði ekki kröfu um framlengingu varðhaldsins en fór þess í stað fram á að maðurinn yrði úrskurðaður í farbann. Héraðsdómur Suðurlands féllst á það klukkan sjö í kvöld.
Maðurinn er grunaður um að hafa banað konu á þrítugsaldri. Hann neitar sök og segist telja að konan hafi látist úr ofneyslu fíkniefna. Rannsókn lögreglu stendur enn og beðið er endanlegrar niðurstöðu úr krufningu.