Verslunin Lindex mun opna á Selfossi þann 7. ágúst næstkomandi, í rými sem í dag hýsir sérverslun Hagkaupa.
Verslunin mun opna samtímis hátíðinni Sumar á Selfossi eða 7. ágúst og verður verslunin sú stærsta sem Lindex hefur opnað utan höfuðborgarsvæðisins. Boðið verður alla vörulínu Lindex; dömu- og undirfatnað og barnafatnað ásamt snyrtivörum og fylgihlutum.
„Fyrir nokkrum árum ákvað Hagkaup að hefja þá vegferð að einfalda reksturinn, til að mæta betur kröfum viðskiptavina. Á síðasta ári var tekin ákvörðun um að hætta með sölu á F&F fatnaði sem að var hryggjarstykkið í sérvöru sölu fyrirtækisins, m.a. í verslun Hagkaups á Selfossi en breytingin sem kynnt er nú er liður í þessari vegferð. Við erum þakklát fyrir alla þá traustu viðskiptavini sem átt hafa viðskipti við okkur undanfarin ár og allra þeirra góðu starfsmanna sem þar starfa. Við þökkum þeim kærlega fyrir ánægjuleg viðskipti og samstarf síðustu árin“, segir Sigurður Reynaldsson framkvæmdastjóri Hagkaups
Lóa D. Kristjánsdóttir, umboðsaðili Lindex á Íslandi, segist spennt fyrir því að opna verslun í sínum heimabæ.
„Við höfum leitað lausna í nokkur ár til að fylgja eftir opnunum á Akranesi, Suðurnesjum og síðast á Egilsstöðum með verslun í okkar heimabæ, á Selfossi, þar sem þetta allt saman byrjaði. Áhuginn hefur ekki látið á sér standa en það er mikið gleðiefni að samningar skuli hafa náðst við Haga um verslunarrýmið við hlið Bónus. Við mátum það svo að við vildum hafa verslunina á Selfossi stærri en áður hafði verið kynnt og bjóða uppá allar vörulínur Lindex. Nýja verslunin verður því stærsta Lindex verslun okkar utan höfuðborgarsvæðisins, tæpir 700 fermetrar og stóð því öðrum valkostum framar. Til viðbótar er það einnig sérlega ánægjulegt að 10 ár eru liðin frá því að við opnuðum okkar fyrstu verslun og nú áratug seinna erum við að opna okkar stærstu verslun utan höfuðborgarsvæðisins og á þeim stað þar sem þetta allt hófst, í mínum heimabæ, Selfossi. Eftir langa bið erum við því full tilhlökkunar að fagna sumrinu og opna á Sumar á Selfossi þann 7. ágúst,“ segir Lóa.
Ný og björt hönnun og öll vörulínan býðst á Selfossi
Þess ber að geta að nýja verslunin á Selfossi verður byggð upp með nýrri innréttingahönnun Lindex sem leit fyrst dagsins ljós við opnun verslunarinnar í London. Hönnunin byggir á björtum litum með ólíkum litbrigðum hvítra lita í bland við svart og viðar sem gefur útliti verslunarinnar skandínavískt yfirbragð. Verslunin mun því veita viðskiptavinum innblástur og einstaklega hlýlegar móttökur og eins og áður segir, sú stærsta utan höfuðborgarsvæðisins og því boðið upp á heildarvörulínu Lindex.
Samfélagsleg ábyrgð
Lindex leggur mikla áherslu á samfélagslega ábyrgð og virðingu fyrir því hvernig varan er framleidd þ.e. umhverfinu og manneskjunni sem framleiðir vöruna sem endurspeglast í stöðugt auknu framboði vara framleiddum úr lífrænni bómull. Fyrirtækið hefur einsett sér að 80% af framleiðslunni verði framleitt með sjálfbærum og umhverfisvænum hætti árið 2025. Einnig hefur Lindex stuðlað að endurnýtingu fatnaðar með því að bjóða viðskiptavinum inneign gegn því að skila til verslunarinnar notuðum fatnaði og verður sú þjónusta nú í boði á Selfossi. Að auki má geta í þessu samhengi að Lindex á Íslandi hefur verið stór styrktaraðili Krabbameinsfélags Íslands og Unicef á Íslandi í gegnum árin og þátttaka í samfélagsverkefnum frá upphafi nema nú meira en 100 millj. króna.
