Stjórn foreldrafélags Barnaskólans á Eyrarbakka og Stokkseyri lýsir yfir eindregnum stuðningi við kennara í baráttunni um betri og réttlátari kjör.
„Sjaldan hefur verið eins mikilvægt að kennarar fái sanngjörn laun og kjör þar sem þeir gegna lykilhlutverki í menntun barna okkar. Laun og kjör kennara eiga að endurspegla þá ábyrgð sem fylgir starfi og þá miklu menntun sem liggur að baki hvers kennara. Það að enn sé ekki búið að semja við kennara 5 mánuðum eftir upphaf kjaraviðræðna er með hæsta máta óeðlilegt og ósanngjarnt. Líka í ljósi þess að skrifað var undir samning um jöfnun launa milli markaða árið 2016,“ segir í yfirlýsingu frá stjórn foreldrafélagsins.
„Kennarar gegna ómetanlegu hlutverki í samfélaginu okkar. Þeir eru undirstaða menntakerfisins og hafa áhrif á komandi kynslóðir. Með þekkingu sinni, fagmennsku og skuldbindingu stuðla kennarar að þroska, vexti og árangri nemenda sinna. Mikilvægt er að kennarar fái þá virðingu sem þeir eiga skilið fyrir þær áskoranir sem þeir takast á við á hverjum degi. Við gerum okkur grein fyrir að kennarar vinna oft langt umfram hefðbundinn vinnutíma, undir miklu álagi og með sífellt auknar kröfur án þess að það endurspeglist í kjörum eða starfsumhverfi þeirra. Þeir vinna óteljandi klukkustundir við að undirbúa kennslustundir, veita stuðning og leiðbeina nemendum sínum,“ segir ennfremur í yfirlýsingunni þar sem því er bætt við að virðing fyrir kennurum feli í sér að viðurkenna mikilvægi þeirra í mótun framtíðarinnar.
„Það felur í sér að meta þeirra framlag, styðja þá í starfi sínu og tryggja að þeir hafi aðgang að þeirri aðstöðu og tækjum sem þeir þurfa til að sinna störfum sínum af kostgæfni. Kennarar eru meira en bara miðlarar þekkingar – þeir eru leiðtogar, fyrirmyndir og innblástur fyrir nemendur sína. Með því að viðurkenna mikilvægi kennara okkar og styðja þá, getum við stuðlað að betri menntun og bjartari framtíð fyrir alla.“
„Við viljum þakka kennurum okkar fyrir ómetanlegt starf í þágu barna okkur og viljum koma því á framfæri að við stöndum með kennurum í þessari löngu, erfiðu og oft ósanngjörnu baráttu og hvetjum því ríki og sveitarfélög til að ganga til samninga við kennara og viðurkenna mikilvægi þeirra,“ segir í lokaorðum yfirlýsingar stjórnar foreldrafélags BES.