Þann 1. október síðastliðinn opnaði Magnús Hermannsson, rafeindavirkjameistari og kerfisstjóri, rafeinda- og tölvuþjónustu í bílskúrnum heima hjá sér, að Úthaga 13 á Selfossi.
„Ég tók þessa ákvörðun í kjölfarið á uppsögn minni, þegar tölvudeild Árborgar var lögð niður þann 1. júlí síðastliðinn,” segir Magnús, sem hefur víðtæka reynslu í rekstri á tölvukerfum og hefur m.a. starfað hjá Árborg, Árvirkjanum, Kögun Keflavík og við Lóranstöðina á Gufuskálum.
Magnús býr yfir mikilli þekkingu þegar kemur að lampagræjum og smíðar meðal annars slíka magnara, auk þess að annast viðgerðir á plötuspilurum, mögnurum og hvers kyns raftækjum.
„Ég býð líka upp á yfirfærslur á stafrænt form, svo sem af vinyl, kassettum, vídeóspólum, bæði VHS, 8mm og MiniDV ásamt því að skanna ljósmyndir og slidesmyndir og koma þeim þannig á stafrænt form. Einnig stendur til að bjóða uppá skýjalausnir hvað það varðar,” segir Magnús en allar upplýsingar um þjónustuna má finna á heimasíðunni tubes.is.
Í október býður Magnús upp á 20% afslátt af öllum yfirfærsluverkefnum sem koma inn og næstkomandi föstudag, þann 14. október verður opið hús og heitt á könnunni á milli klukkan 16 og 19. Annars er auglýstur opnunartími 9-16 virka daga og eftir samkomulagi. Síminn er 699-7684.
