Hanna Katrín Friðriksson, matvælaráðherra, heimsótti nýverið höfuðstöðvar Matvælastofnunar á Selfossi. Hrönn Ólína Jörundsdóttir forstjóri MAST, fræddi ráðherra um víðfeðma starfsemi stofnunarinnar, sem er með tíu starfsstöðvar á landsbyggðinni auk höfuðstöðva og útibús í Reykjavík.
Þau málefni MAST sem hafa verið í brennidepli voru einnig rædd. Að ósk ráðherra er matvælaráðuneytið í viðræðum við dómsmálaráðuneytið um að kanna möguleika þess að Neyðarlínan taki við tilkynningum almennings í gegnum 112 um slæman aðbúnað eða vonda meðferð dýra. Þar með verði til staðar einföld og skilvirk leið ef þarf að koma tilkynningu um dýr í hættu.
Einnig ræddu forstjóri og ráðherra þær almennu áskoranir sem framundan eru í málefnum dýraverndar og lagareldis.
„Mikilvægi MAST hefur farið vaxandi,“ segir Hanna Katrín. „Stofnunin sinnir eftirliti með framleiðslu og útflutningi matmæla og hefur yfirumsjón með matvælaeftirliti á vegum sveitarfélaga auk þess að sinna heilbrigði og velferð dýra á landsvísu og eftirliti með störfum dýralækna. Velferð dýra skipar sífellt stærri sess í umræðunni og þær kröfur sem gerðar eru til MAST hafa aukist í samræmi við það. Við leggjum því áherslu á að stofnunin hafi nauðsynleg úrræði til að takast á við síbreytilegt og krefjandi hlutverk.“