Ásthildur Lóa Þórsdóttir, mennta- og barnamálaráðherra, heimsótti Selfoss í gær en tilgangur heimsóknarinnar var að kynna sér skóla- og frístundastarf í Sveitarfélaginu Árborg.
Fjölbrautaskóli Suðurlands var sóttur heim við góðar móttökur Soffíu Sveinsdóttur skólameistara, ásamt aðstoðarskólameistara og fulltrúum nemendafélagsins. Ráðherra fékk kynningu á skólanum og kynntist starfsfólkinu.
Bragi Bjarnason bæjarstjóri, Heiða Ösp Kristjánsdóttir sviðstjóri fjölskyldusviðs og Gunnar Eysteinn deildastjóri frístundaþjónustu ásamt fleiri starfsmönnum tóku á móti ráðherra í félagsmiðstöðinni Zelsíuz. Þar var starfsemi félagsmiðstöðvarinnar kynnt ásamt þróunarverkefni þeirra, Elju, sem ætlað er að auka félagsvirkni barna og ungmenna.
Þriðji viðkomustaðurinn var á leikskólanum Jötunheimum þar sem Júlíana Tyrfingsdóttir, leikskólastjóri, tók á móti ráðherra, ásamt aðstoðarleikskólastjóra og Heiðu Ösp. Júlíana sagði frá því faglega starfi sem þar er og einnig hvernig þau ná að halda utan um sinn glæsilega starfsmannahóp.
