Rennsli í Ölfusá náði hámarki síðdegis í gær eftir miklar leysingar undanfarna daga. Víða hafa ár og lækir á Suðurlandi flætt yfir bakka sína undanfarna daga.
Í færslu frá Eldfjalla- og náttúruvárhópi Suðurlands kemur fram að rennsli Ölfusár við Selfoss mældist um 1.150 m3/sek síðdegis í gær, en síðan fór að sjatna í ánni.
Þetta er mesta rennsli sem mælst hefur á vatnshæðarmæli við Selfoss í níu ár, eða síðan í lok febrúar 2013. Þá náði rennslið um 1.400 m3/sek. Ölfusá var nánast bakkafull neðan við Ölfusárbrú í gær en þó vantaði töluvert uppá að vatnavextirnir yllu einhverjum usla.