Sveitarstjórn Flóahrepps fagnar því að Vegagerðin vinni nú að undirbúningi á breikkun Þjóðvegar 1 frá Selfossi að Þjórsá.
Málið var rætt á fundi sveitarstjórnar í gær en áður hafa fulltrúar Flóahrepps setið einn fund með Vegagerðinni vegna málsins.
„Breikkun hringvegarins í gegnum Flóahrepp ætti að auka umferðaröryggi til muna og leggur sveitarstjórn áherslu á að hvergi verði gefinn afsláttur varðandi umferðaröryggi vegfarenda á þessum vegkafla og á það jafnt við um akandi, hjólandi, gangandi og ríðandi umferð,“ segir í bókun sveitarstjórnar, sem leggur jafnframt áherslu á að Vegagerðin eigi snemma í ferlinu samtal við landeigendur í Flóahreppi þar sem framkvæmdir munu óhjákvæmilega hafa áhrif á landeigendur meðfram veginum.
„Ljóst er að undirbúningur mun taka nokkur ár áður en til framkvæmda kemur en að mati sveitarfélagsins er mikilvægt að samvinna og samráð við hlutaðeigandi verði snemma í ferlinu,“ segir ennfremur í bókuninni.