25. Kjördæmisþing Kjördæmissambands Framsóknarfélaganna í Suðurkjördæmi skorar á ríkisstjórnina að endurskoða þegar verklag við breytingar á sköttum eða skattahækkunum.
Þetta kemur fram í ályktun sem samþykkt var á kjördæmisþingi í Suðurnesjabæ síðastliðinn laugardag.
Framsóknarmenn segja að breytingar og hækkanir á sköttum geti haft víðtæk áhrif á atvinnulíf um allt land og mikilvægt sé að samráð sé haft við sveitarfélög landsins.
„Sveitarfélög eiga mikið undir að ríkið kollvarpi ekki atvinnugreinum og raski þannig lífskjörum heilu byggðarlaganna með óvandvirkum vinnubrögðum,“ segir ennfremur í ályktuninni.
Ríkið beri virðingu fyrir sjálfsákvörðunarrétti sveitarfélaga
Á kjördæmisþinginu var einnig samþykkt ályktun þar sem skorað er á ríkisstjórnina að stórefla samstarf og samráð við sveitarfélögin í landinu og bera virðingu fyrir sjálfsákvörðunarrétti þeirra og hagsmunum íbúa þeirra.