Fulltrúar sjö stéttarfélaga sendu í gær frá sér tilkynningu í tilefni af fréttaskýringaþætti Kveiks í fyrrakvöld þar sem fjallað var um aðbúnað verkafólks, misneytingu og vinnumansal.
Stéttarfélögin telja ástæðu til að árétta að mál af þeim toga sem fjallað var um í þættinum, varðandi launaþjófnað og slæman aðbúnað verkafólks koma reglulega á borð félaganna.
„Mikið er um alvarleg brot gagnvart verkafólki og er erlent verkafólk í sérstaklega viðkvæmri stöðu. Algengt er að laun og kjör séu undir lágmarkskjörum og of oft gengur erfiðlega að fá laun greidd. Brot gegn húsaleigulögum eru algeng, oft eru vistarverur óboðlegar, gjald fyrir húsnæði óeðlilega hátt og framkoma gegn starfsfólki slæm,“ segir í tilkynningunni sem meðal annars er undirrituð af formönnum Bárunnar stéttarfélags og Verkalýðsfélags Suðurlands.
Félögin vilja árétta að mikið skortir á eftirlit af hálfu opinberra aðila hérlendis og afleiðingar af brotum gegn réttindum launafólks af hálfu hins opinbera séu af skornum skammti.
„Þá er rétt að árétta sérstaklega að líkt og fram kom í þættinum gera opinberir aðilar samninga við fyrirtæki án þess að hafa nokkuð eftirliti með kjörum eða aðbúnaði starfsfólks þess aðila sem samið er við,“ segir ennfremur í tilkynningu félaganna sem skora á stjórnvöld að herða eftirlit og setja vinnu og fjármagn í þennan málaflokk þegar í stað, enda sé núverandi staða landinu til skammar.