Ný lögreglustöð hefur verið opnuð að Ránargötu 1 í Vík í Mýrdal, í húsnæði sem áður hýsti Arion banka.
Umdæmi lögreglunnar á Suðurlandi er víðfeðmasta lögregluumdæmi landsins og þar eru starfræktar fimm starfsstöðvar; á Selfossi, Hvolsvelli, Vík í Mýrdal, Kirkjubæjarklaustri og á Höfn í Hornafirði. Í Vík hefur lögreglan haft starfsaðstöðu í tveimur skrifstofurýmum í húsnæði sýslumannsins á Suðurlandi við Ránarbraut 1.
Nú hefur jarðhæð hússins verið gerð upp og þar byggð nútímaleg lögreglustöð sem mun þjóna starfseminni. Miklar breytingar hafa verið gerðar á húsnæðinu, sem hafa verið rúmlega ár í bígerð.
Breytir öllu
„Ný lögreglustöð á þessu svæði breytir öllu fyrir okkur og er mikilvægur liður í því að efla starfsemina á miðsvæði embættisins. Samfélagið í Vík og nærsveitum hefur farið ört stækkandi, mikill fjöldi ferðamanna fer þar í gegn og við verðum að vera við öllu búin þegar kemur að kröftugri náttúru á þessu svæði. Í nýrri lögreglustöð felast mikil sóknarfæri, þar er aðstaða fyrir lögreglumenn til að dvelja en það mun auðvelda okkur að tryggja mönnun á svæðinu. Þá mun fundaraðstaða og afgreiðsla gera okkur kleift að nýta stöðina fyrir fjölbreyttari verkefni en okkur hefur gefist kostur á hingað til,“ segir Grímur Hergeirsson, lögreglustjóri á Suðurlandi, í samtali við sunnlenska.is.
Nýlega var bætt við stöðu aðalvarðstjóra í Vík. Sú ráðstöfun leiðir meðal annars til bættrar þjónustu við almenning en fastur opnunartími afgreiðslu verður mánudaga til miðvikudaga frá 9 til 15. Á öðrum tímum verður áfram hægt að nálgast vakthafandi lögreglu á svæðinu.
Formleg opnun nýju lögreglustöðvarinnar verður þriðjudaginn 25. febrúar næstkomandi klukkan 14 til 16. Á þeim tíma verður lögreglustöðin opin fyrir gesti og gangandi og heitt á könnunni.