Sveitarstjórn Skaftárhrepps samþykkti á fundi sínum í desember að gera endurbætur á byggðamerki sveitarfélagsins.
Nýja byggðamerkið er hannað á grunni þess gamla, með færri litum og einfaldari línum. Eftir breytingarnar mun merkið henta betur til prentunar og framleiðslu á kynningarefni.
„Það er ekki vitað hver teiknaði merkið á sínum tíma og það var ekki til í almennilegu kerfi svo hægt væri að nota það í alla prentun. Það var því ákveðið að einfalda merkið og var Vilborg Anna Björnsdóttir, hönnuður, fengin í það verkefni,“ sagði Einar Kristján Jónsson, sveitarstjóri Skaftárhrepps, í samtali við sunnlenska.is.
Skaftárhreppur varð til við sameiningu fimm hreppa árið 1990 og á merkinu má sjá Lómagnúp, kríu og svo melgresi með fimm öxum, misstórum eftir stærð gömlu hreppanna sem sameinuðust á sínum tíma; Álftavershrepps, Leiðvallahrepps, Skaftártunguhrepps, Kirkjubæjarhrepps og Hörgslandshrepps.
Að sögn Einars verður nýja merkinu skipt út smátt og smátt með tímanum fyrir það gamla.
