Nú hafa verið sett upp ný skilti við gönguleiðina niður í Reynisfjöru, til viðvörunar fyrir ferðamenn um þá hættu sem stafað getur af öldufari við ströndina.
Auk skiltanna var komið fyrir 300 metra langri keðju meðfram bílastæðinu sem leiðir fólk eftir göngustíg og framhjá skiltunum. Einnig hafa verið settar upp öryggismyndavélar við fjöruna og streyma þær myndefni beint inn á varðstofur lögreglunnar, bæði í umdæminu og í fjarskiptamiðstöð lögreglu í Skógarhlíð í Reykjavík.
Samhliða uppsetningu skiltanna var sett upp viðvörunarkerfi sem varar við yfirvofandi hættu með grænu, gulu eða rauðu blikkandi ljósi. Í tilkynningu frá lögreglunni á Suðurlandi segir að þessar merkingar séu í samræmi við það sem þekkist víða um heim og standa vonir til þess að með því megi auka árvekni ferðamanna sem fara niður á ströndina.
Verkefnið er unnið í samstarfi Ferðamálastofu, Vegagerðarinnar, Neyðarlínunnar, Veðurstofu Íslands og Mýrdalshrepps auk þeirra fjölmörgu landeigenda sem komið hafa að máli.
