Sveitarfélagið Ölfus varð í vikunni formlega aðili að Heilsueflandi samfélagi. Ölfus er 41. sveitarfélagið sem gerist Heilsueflandi samfélag og búa nú um 96% landsmanna í slíku samfélagi.
Sandra Dís Hafþórsdóttir, staðgengill bæjarstjóra og Alma D. Möller, landlæknir, undirrituðu samning þess efnis í ráðhúsi Ölfuss í Þorlákshöfn síðastliðinn miðvikudag en viðstaddir voru íbúar á ýmsum aldri. Nemendur í 5.-7. bekk grunnskóla Þorlákshafnar sýndu frumsaminn dans við lag Júlí Heiðars, sem unninn var í umsjá Önnu Berlindar Júlídóttur danskennara.
Fulltrúar frá skólum bæjarins, íþróttafélögum, heilsugæslu og eldri borgurum eiga sæti í HSAM stýrihópnum auk þess sem aðrir hagaðilar verða kallaðir að starfinu eftir þörfum. Jóhanna M. Hjartardóttir sviðsstjóri fjölskyldu- og fræðslusviðs og Ragnar M. Sigurðsson íþrótta- og tómstundafulltrúi fara fyrir hópnum og eru HSAM tengiliðir Ölfuss.
Meginmarkmið Heilsueflandi samfélags er að styðja samfélög í að vinna með markvissum hætti að því að skapa umhverfi og aðstæður sem stuðla að heilbrigðum lifnaðarháttum, heilsu og vellíðan allra íbúa. Í slíku samfélagi er heilsa og líðan íbúa í fyrirrúmi í stefnumótun og aðgerðum á öllum sviðum.