Atvinnubrú undir stjórn Háskólafélags Suðurlands í samstarfi við Sóknaráætlun Suðurlands hefur auglýst eftir fyrirtækjum til þátttöku í rafrænum hádegisfundum á tímabilinu 15. september til 15. nóvember.
Hádegisfundirnir eru vettvangur fyrir fyrirtæki til þess að kynna starfsemi sína fyrir háskólanemendum og öðrum áhugasömum aðilum og er markmiðið að opna dyrnar til aukins tengslanets og samstarfs fyrirtækja á Suðurlandi.
„Við vitum oft ekki hvernig starfsemi er innan fyrirækja, hvaða verkefni eru í forgangi og hvers vegna. Flóra starfsfólks getur verið mjög fjölbreytt og bakgrunnur starfsmanna ólíkur. Hér er urmull af starfsemi sem við vitum ekki einu sinni af og því viljum við opna á þann möguleika fyrir rekstraraðila að kynna sig og kynnast öðrum á svæðinu,“ segir Helga Kristín Sæbjörnsdóttir, verkefnastjóri hjá Háskólafélagi Suðurlands.
Það kostar ekkert að taka þátt en hægt er að skrá sig til þátttöku með því að smella hér.
„Þeir sem vilja jafnvel ganga skrefinu lengra og bjóða háskólanemendum til heimsókna geta einnig skráð sig til leiks. Heimsóknirnar eru eingöngu ætlaðar háskólanemendum og eiga að gefa möguleikann á stærra tenglsaneti, nýsköpun, atvinnusköpun eða opna á hugsanleg tækifæri sem liggja í loftinu,“ bætir Helga Kristín við.