Órói hefur verið að mælast að Fjallabaki síðasta klukkutímann en upptök hans virðast vera norðvestur af Torfajökli.
Samkvæmt upplýsingum frá Eldfjalla- og náttúruvárhópi Suðurlands hefur ekki tekist að greina uppruna óróans sem hefur birst í nokkrum bylgjum.
Sumarið 2023 varð skammvinnt landris á svæðinu og af og til verða skjálftahrinur í Torfajökulseldstöðinni.
Í samtali við mbl.is segir Elísabet Pálmadóttir, náttúruvársérfræðingur á Veðurstofunni að líklegast tengist óróinn jarðhita á svæðinu. Nokkrir skjálftar hafi verið á þessu svæði síðustu daga.
„Við þurfum alltaf að taka óróa svolítið alvarlega,“ segir Elísabet.