Síðastliðinn miðvikudag barst tilkynning til Heilbrigðiseftirlits Suðurlands um að einstaklingar sem höfðu gist hjá ferðaþjónustunni Rjúpnavöllum í Landssveit í lok júlí hefðu veikst af iðrasýkingu.
Heilbrigðiseftirlitið fór samdægurs í eftirlitsheimsókn og tók vatnssýni til rannsókna. Fyrstu niðurstöður lágu fyrir síðastliðinn föstudag og bentu til E. coli mengunar í vatni. Í kjölfarið fengu staðarhaldarar tilmæli um að sjóða allt neysluvatn og að upplýsa gesti um mögulega mengun. Næsta dag barst staðfesting þess að E. coli hafi greinst í vatnssýnum en þó í litlu magni. Í tilkynningu frá Heilbrigðiseftirliti Suðurlands segir að þessar niðurstöður bendi til mögulegrar mengunar í neysluvatni á svæðinu sem kallar á frekari rannsóknir og aðgerðir.
Matvælastofnun og sóttvarnalæknir voru upplýst um málið á mánudaginn og í gær var boðað til fundar stýrihóps í samræmi við verklag við rannsóknir á vatns- eða matarbornum hópsýkingum. Á þeim fundi voru fulltrúar Heilbrigðiseftirlits Suðurlands, Matvælastofnunar, sóttvarnalæknis, umdæmis-/svæðislæknar Suðurlands og sýkla- og veirufræðideildar Landspítala.
Á fundinum kom fram að um nokkurn fjölda fólks virðist vera að ræða sem voru á ferðalagi á þessu landsvæði en uppruni og orsök veikindanna hafa ekki verið staðfest. Upplýsingasöfnun var skipulögð með það að markmiði að kortleggja umfang málsins, þar með talið fjölda og ferðir þeirra sem veiktust. Heilsugæslan skipuleggur sýnatökur frá einstaklingum sem tengjast málinu.