Mennta- og menningarmálaráðherra skipaði starfshóp í nóvember 2019 til að fara yfir stöðu og framtíðarskipulag starfsmenntanáms við Landbúnaðarháskóla Íslands sem fram fer á Hvanneyri og að Reykjum í Ölfusi.
Tilefnið var áhyggjur hagaðila í garðyrkjugreinum sem töldu að verið væri að breyta inntaki og sýnileika námsins. Eins og sunnlenska.is greindi frá í gær birtu hagsmunaaðilar í garðyrkju sérálit sitt vegna málsins, þar sem þeir segja að hagsmunir atvinnugreinarinnar og starfsmenntanámsins séu fyrir borð bornir.
Landbúnaðarháskóli Íslands skilaði einnig séráliti til mennta- og menningarmálaráðuneytisins í fyrrasumar og þar kemur fram að tækifæri innan garðyrkjunnar á Íslandi séu gríðarleg og brýnt að aðilar taki höndum saman ásamt stjórnvöldum um að koma innviðum á Reykjum í það horf að þeir séu fremstir í flokki á alþjóðlegan mælikvarða. Þannig mun námið verða sýnilegra og draga að unga fólkið sem þarf til nýliðunar. Einnig kemur fram í áliti LbhÍ að samstarf verði um að efla rannsóknir og nýsköpunarstarf enn frekar sem muni skila sér í bættum innviðum og til starfsmenntanámsins og atvinnulífsins með skilvirkum hætti.
Í séráliti LbhÍ er lögð áhersla á styrkleika og samlegðaráhrif á milli skólastiga sem er ein af sérstöðum skólans. Í desember sl. ákvað mennta- og menningarmálaráðherra að starfsmenntanám í garðyrkju yrði fært til Fjölbrautaskóla Suðurlands. Undirbúningur að því hefur verið í gangi á undanförnum mánuðum og hefur Landbúnaðarháskóli Íslands sent frá sér þarfagreiningu um rannsóknir sem fram fara á Reykjum. FSu vinnur enn að þarfagreiningu sem snýr að starfsmenntanáminu í samvinnu við starfsfólk á Reykjum.
„Á undanförnum misserum hefur verið gert stórátak í átt að því að bæta innviði á Reykjum. Garðskálinn hefur verið endurbyggður og ýmsu öðru viðhaldi verið sinnt. Kynningarstarf hefur verið öflugt og nemendur skólans aldrei verið fleiri. Aðsókn í námið sló öll met sl. haust,“ segir í frétt sem birtist á heimasíðu LbhÍ í gær.
LbhÍ hefur lagt áherslu á að samlegðaráhrif sem eru á milli starfsmenntanámsins annars vegar og rannsóknastarfseminnar hins vegar verði áfram tryggð við breytinguna.