Slökkviliðsmenn frá Brunavörnum Árnessýslu á Selfossi voru kallaðir út á þriðja tímanum í dag þegar tilkynnt var um reyk sem lagði frá íbúðarhúsi á Selfossi.
Íbúðin var mannlaus en í ljós kom að eldfast mót hafði gleymst á eldavélarhellu og hitnað undir. Töluverður reykur var í íbúðinni en greiðlega gekk að reykræsta hana.
Ríkisútvarpið greindi frá þessu og hefur eftir Lárusi Kristni Guðmundssyni, varaslökkviliðsstjóra, að þetta sé annað útkall dagsins en í morgun bárust nokkrar ábendingar vegna mikils reyks sem virtist leggja frá sumarbústað við Þingvallaveg. Reykurinn reyndist frá kamínu sem notuð var til að hita vatn fyrir heitan pott.