Folaldasýning Geysis fór fram síðastliðinn sunnudag í Skeiðvangi á Hvolsvelli. Frábær þátttaka var á þessari stórskemmtilegu sýningu en 32 folöld voru skráð til leiks.
Eitt af markmiðum Hestamannafélagsins Geysis að rækta reiðhrossastofna héraðsins til meiri fegurðar og kosta. Þar hafa félagar staðið sig gríðarlega vel síðustu ár og ljóst er að framtíðin er verulega björt.
Efstu þrjú hestfolöldin:
1. Rökkvi frá Hvolsvelli undan Spaða frá Stuðlum og Frigg frá Hvolsvelli.
2. Örn frá Baldurshaga undan Ellert frá Baldurshaga og Halastjörnu frá Baldurshaga.
3. Greipur frá Árbæ undan Glampa frá Skeiðháholti og Gleði frá Árbæ.
Efstu þrjú merfolöldin:
1. Hrafnkatla frá Hemlu undan Forki frá Breiðabólsstað og Hrafndísi frá Hemlu II.
2. Aradís frá Miðkoti undan Fáfni frá Miðkoti og Atorku frá Miðkoti.
3. Eldrún frá Miðkoti undan Fáfni frá Miðkoti og Enju frá Miðkoti.
Fengu Sjóðsbikarinn og Elísubikarinn
Glæsilegir vinningar voru veittir fyrir efstu þrjú folöldin í hvorumflokki ásamt farandgripum fyrir efsta sætið í hvorum flokki.
Reglulega hafa folaldasýningar á vegum deilda Geysis farið fram en þetta var í fyrsta skipti sem félagið sjálft stóð fyrir folaldasýningu. Leitað var til þeirra félaga sem síðast hafa átt efsta heiðursverðlaunahest og efstu heiðursverðlaunahryssuna. Síðasti heiðursverðlaunahestur ræktaður af Geysisfélaga er Sjóður frá Kirkjubæ en hann hlaut heiðursverðlaun fyrir afkvæmi á Landsmóti 2022. Voru það ræktendur Sjóðs, Blesi ehf/Kirkjubæ, sem gáfu þennan bikar og kallast hann því Sjóðsbikarinn. Síðasta heiðursverðlaunahryssa ræktuð af Geysisfélaga er Elísa frá Feti sem er í eigu Takthesta á Rauðalæk, fékk því bikarinn nafnið Elísubikarinn.
Folald sýningarinnar var kosið af áhorfendum og gaf Siggi Valur teiknari glæsilega mynd. Það fór svo að folald sýningarinnar var Litli- Rökkvi frá Litlalandi í Ásahreppi og eigandi hans er Eva Hrönn Ásmundsdóttir.
