Kristrún Frostadóttir formaður Samfylkingarinnar og Oddný Harðardóttir þingmaður Samfylkingarinnar í Suðurkjördæmi boða til opinna funda á Suðurlandi á morgun, 3.október.
„Við hlökkum til að eiga samtöl við heimamenn um húsnæðismálin, kjörin og málefni fjölskyldna,“ segir Kristrún en fundirnir eru liður í umfangsmiklu málefnastarfi flokksins um allt land.
Málin verða rædd yfir ljúffengri súpu á veitingastaðnum Mika í Reykholti í Bláskógabyggð kl. 12:00. Á Þorlákshöfn verður slegið upp fjölskyldugrilli í Versölum kl. 17:30. Loks verður boðið í kvöldspjall í Tryggvaskála á Selfossi kl. 20:00.
Málefnastarfið opnað upp á gátt
„Það hefur verið kappsmál hjá okkur að opna málefnastarf Samfylkingarinnar upp á gátt þannig að fólk um allt land geti tekið þátt í að leggja grunn að áherslum og forgangsröðun flokksins í veigamestu málaflokkum. Það er öllum velkomið að taka þátt í samtalinu og koma á framfæri sínum sjónarmiðum,“ segir Kristrún. „Heilbrigðismálin voru í forgrunni í fyrra, svo atvinna og samgöngur síðasta vetur og nú erum við að taka hringferð um húsnæðis- og kjaramálin.“
Jóhann Páll er formaður stýrihópsins sem fer fyrir vinnunni. „Við erum meðal annars að kortleggja hvernig er hægt að byggja meira, hraðar og betur til að koma jafnvægi á íbúðamarkaðinn, hvernig er skynsamlegt að styðja betur við barnafólk og tryggja að eldra fólk njóti ávinnings af því að hafa greitt í lífeyrissjóði.“