Í dag var undirritaður samningur milli íslenska ríkisins og Landsvirkjunar um lands- og vindorkuréttindi vegna vindorkugarðs við Vaðöldu í Rangárþingi ytra, sem hið opinbera nefnir Búrfellslund en heimamenn réttilega Vaðölduver.
Bjarni Benediktsson forsætisráðherra og Hörður Arnarson, forstjóri Landsvirkjunar, undirrituðu samninginn og sagði forsætisráðherra fagnaðarefni að vindorkan verði þriðja stoðin í orkukerfi landsins.
Með samningnum veitir íslenska ríkið Landsvirkjun heimild til að reisa og reka vindorkuver á skilgreindu svæði sunnan Sultartangastíflu innan þjóðlendu. Landsvirkjun fær í því skyni tímabundinn afnotarétt að lands- og vindorkuréttindum á svæðinu en samningurinn gildir í 35 ár frá því að vindorkuverið hefur rekstur með mögulegri framlengingu einu sinni um 15 ár.
„Búrfellslundur“ var færður í nýtingarflokk rammaáætlunar í júní 2022 en Landsvirkjun hóf undirbúning verkefnisins árið 2010. Gert er ráð fyrir að allt að 30 vindmyllur verði reistar í vindorkugarðinum og að uppsett afl verði um 120 MW. Virkjunarleyfi vegna vindorkuversins var gefið út af Orkustofnun fyrr í vikunni og mun Landsvirkjun í kjölfarið sækja um framkvæmdaleyfi til sveitarstjórnar Rangárþings ytra.
Fyrr í sumar samdi Landsvirkjun við Landsnet um flutning um tengingu vindorkuversins inn á raforkuflutningskerfið en áætlanir gera ráð fyrir að orka frá „Búrfellslundi“ verði farin að skila sér inn á raforkukerfið fyrir árslok 2026.