Listakonan Sigríður Jóna Kristjánsdóttir, Sigga á Grund í Flóahreppi, mun fá heiðurslaun listamanna samkvæmt breytingartillögu við fjárlög sem meirihluti allsherjar- og menntamálanefndar Alþingis hefur lagt fram.
Samkvæmt lögum um heiðurslaun listamanna fá 25 listamenn heiðurslaun. Á þessu ári létust tveir þeirra, Hreinn Friðfinnsson og Matthías Johannessen, og í þeirra stað bætast Sigga og Einar Hákonarson, myndlistarmaður, við hóp heiðurslaunaþega.
Þeir einir geta notið heiðurslauna sem hafa varið starfsævi sinni eða verulegum hluta hennar til liststarfa eða skarað fram úr við listsköpun sína eða ef störf þeirra að listum hafa skilað miklum árangri á Íslandi eða á alþjóðavettvangi.
Sigga er þekktasti listamaður þjóðarinnar þegar kemur að útskurði í tré. Hún hefur meðal annars skorið út allar gangtegundir íslenska hestsins og síðasta vetur skar hún út nýjan fundarhamar fyrir allsherjarþing Sameinuðu þjóðanna í stað hamars Ásmundar Sveinssonar sem hafði brotnað.
Á áttræðisafmæli Siggu í maí síðastliðnum var hún útnefnd fyrsti heiðursborgari Flóahrepps.
