Sjálfstæðisflokkurinn er með 21,1 prósenta fylgi í Suðurkjördæmi og hefur mesta fylgið í kjördæminu í nýjasta Þjóðarpúlsi Gallup.
Gallup fékk 681 svar frá kjósendum í Suðurkjördæmi í netkönnun þann 2. febrúar síðastliðinn og birtir sunnlenska.is niðurstöðurnar úr Suðurkjördæmi í samstarfi við RÚV.
Sjálfstæðisflokkurinn fékk 19,6% fylgi í alþingiskosningunum í nóvember síðastliðnum og bætir því við sig fylgi síðan þá.
Fylgi Flokks fólksins dalar talsvert er nú 15,2% nú en var 20,0% í kosningunum. Suðurkjördæmi er áfram sterkasta vígi Flokks fólksins á landinu.
Samfylkingin bætir við sig fylgi, er með 18,6% í Þjóðarpúlsinum en fékk 16% í síðustu kosningum. Framsóknarflokkurinn bætir sömuleiðis við sig, fær 12,0% fylgi nú en var með 8,8% í kosningunum.
Aðrir flokkar á þingi eru á svipuðu róli nú og þegar talið var upp úr kjörkössunum. Miðflokkurinn með 13,7% og Viðreisn 12%. Önnur framboð tapa fylgi frá síðustu kosningum, nema Píratar sem eru í 2,6% en Sósíalistar eru í 2,0%, Vinstri græn í 1,8%, Lýðræðisflokkurinn í 0,7% og Ábyrg framtíð í 0,1%
Ekki yrðu breytingar á kjördæmakjörnum þingmönnum ef þetta yrðu niðurstöður þingkosninga; Sjálfstæðisflokkurinn er með 2 þingmenn, Samfylkingin 2, Flokkur fólksins 2, Miðflokkurinn 1, Framsókn 1 og Viðreisn 1.