Sveitarstjórn Hrunamannahrepps skorar á stjórnendur Heilbrigðisstofnunar Suðurlands að tryggja íbúum og gestum Uppsveita Árnessýslu eins góða bráðaþjónustu og kostur er, sérstaklega í ljósi þess gríðarlega fjölda fólks sem hér dvelur daglega, allt árið um kring, bæði íbúar og ekki síður gestir svæðisins.
Svona hljóðar bókun sveitarstjórnar frá síðasta fundi hennar. Undir sama dagskrárlið tengdist Díana Óskarsdóttir, forstjóri HSU, fundinum í gegnum fjarfundabúnað og gerði grein fyrir þeim skipulagsbreytingum sem fyrirhugaðar eru hjá HSU í Laugarási.
Samningum um bakvaktir lækna sem starfa í Laugarási hefur verið sagt upp frá og með 1. september næstkomandi og eftir það verður enginn læknir á vakt í Uppsveitum Árnessýslu eftir að dagvinnu lýkur en læknir á bakvakt hefur hingað til sinnt bráðatilfellum sem komið hafa upp á svæðinu.
Í greinargerð með bókun sinni nefnir sveitarstjórn Hrunamannahrepps að mögulega mætti tryggja viðveru sjúkrabifreiðar og sérhæfðra sjúkraflutningamanna í Uppsveitum, sem sinnt gætu fyrsta viðbragði en slíkt væri algjörlega nauðsynlegt ef að fyrirhugaðar breytingar á bakvöktum verða að veruleika.
„Öflug heilsugæsla er afar mikilvæg hverju samfélagi og því nauðsynlegt að henni sé sinnt eins og lög gera ráð fyrir. Það er sveitarstjórn Hrunamannahrepps kappsmál að heilsugæsla í Uppsveitunum sé með þeim hætti að hún geti sinnt þörfum íbúa og gesta svæðisins með sem allra bestum hætti og að öryggi þessa stóra hóps sé þar með vel tryggt,“ segir í greinargerð sveitarstjórnar, sem hvetur einnig stjórnendur HSU til að skoða þann möguleika að læknavakt verði í boði seinnipart dags í Uppsveitunum.