Ungur ökumaður og tveir farþegar sluppu með skrekkinn þegar bíll þeirra valt út fyrir veg á Hvammsvegi við Gljúfurárholt í Ölfusi síðdegis í dag.
Ökumaðurinn missti stjórn á bílnum í beygju og valt bíllinn að minnsta kosti tvær veltur út fyrir malbikaðan veginn.
„Ökumaðurinn og farþegarnir komust út af sjálfsdáðum og sluppu með skrámur. Það var hlúð að þeim í sjúkrabíl á vettvangi sem ók þeim síðan á bráðamóttökuna á Selfossi,“ sagði Pétur Pétursson, slökkviliðsstjóri Brunavarna Árnessýslu, í samtali við sunnlenska.is.
Talsvert viðbragð var vegna slyssins en auk lögreglu og sjúkraflutningamanna voru liðsmenn Brunavarna Árnessýslu í Hveragerði kallaðir út, þar sem talið var í fyrstu að beita þyrfti klippum til að ná fólkinu úr bílnum. Slökkviliðsmenn hreinsuðu brak á vettvangi og sáu til þess að olía læki ekki af bílnum, sem er stórskemmdur eftir veltuna.