Nemendur Grunnskólans í Hveragerði afhentu Barnaspítala Hringsins á dögunum rúmlega 1,3 milljónir króna að gjöf en upphæðin safnaðist á góðgerðardegi skólans þann 1. desember síðastliðinn.
Á góðgerðardeginum voru seldar ýmsar afurðir sem unnar höfðu verið af nemendum skólans dagana á undan.
Það er áralöng hefð í skólanum að vera með gangasöng á aðventunni og er síðasti gangasöngurinn er ávallt opinn gestum og gangandi. Það var hátíðleg stund þegar nemendur og gestir komu saman á dögunum og sungu inn jólin en heiðursgestir á opna gangasöngnum var stjórn Hringsins.
Hringurinn hefur það markmið að vinna að líknar- og mannúðarmálum, sérstaklega í þágu barna. Aðalverkefni félagsins um áratugaskeið hefur verið uppbygging Barnaspítala Hringsins.
Það voru Gígja Marín Þorsteinsdóttir, formaður nemendafélags GÍH og Tryggvi Hrafn H. Tryggvason, yngsti nemandi skólans, sem afhentu Sonju Egilsdóttur, formanni Hringsins, táknrænt skjal fyrir millifærslu upp á 1.316.000 krónum til Barnaspítalans.
Mikill fjöldi fólks mætti á þessa stund og fólk tók hressilega undir jólalögin sem sungin voru.
