Það var einmuna blíða og frábær stemning í Skaftholtsréttum í Gnúpverjahreppi í gær. Fjallmönnum gekk þokkalega að sækja féð þó að veðrið hafi ekki leikið við þá allan tímann.
„Þetta gekk bara þokkalega miðað við aðstæður og veður. Við hrepptum vont veður á þriðjudaginn en annars var þetta ágætt,“ sagði Guðmundur Árnason, fjallkóngur, í samtali við sunnlenska.is. „Já, það var stjörnuvitlaust veður á þriðjudaginn,“ bætti Finnbogi Jóhannsson, aldursforseti fjallmanna við.
Þeim Guðmundi og Finnboga leist vel á féð sem kemur vænt af fjalli. „En það er sífellt erfiðara að smala afréttinn, það myndast ekkert rennsli, þetta eru bara spikfeitar rollur sem hugsa bara um að bíta,“ segja þeir félagarnir hlæjandi. „Svo vilja þær bara helst láta sækja sig þar sem þær voru skildar eftir í byrjun sumars.“
Fjallkóngurinn Guðmundur fór fyrst á fjall árið 1986 og hefur farið nánast á hverju ári síðan, þó með örfáum hléum. „Þetta eru allt góðar ferðir og ekkert eitt sem stendur uppúr,“ segir Guðmundur. „Ja, hitabylgjan í hittifyrra var nú ansi eftirminnileg, þegar hitinn fór í tuttugu stig á fjöllum,“ bætir Finnbogi við. Hann hefur séð tímana tvenna í sauðfjárrækinni en hann fór í sína fyrstu fjallferð árið 1964.
