Brúargólf nýju brúarinnar yfir Stóru-Laxá var steypt í síðustu viku. Verkið gekk vel í stilltu veðri en steypuvinnan stóð yfir samfellt í 30 klukkustundir.
Vegna kuldatíðar var byggð yfirbygging yfir brúna og tjaldað yfir og niður með hliðum að jörð. Kynt var bæði undir brúargólfið og einnig tjaldið yfir brúargólfinu áður en steypt var, þannig að þar inni var um 10°C hiti þegar steypuvinna hófst. Ekki er vitað til að brú hafi áður verið yfirbyggð með þessum hætti hérlendis.
Í gær hófst svo vinna við uppspennu brúardekksins. Áætlað er að sú vinna taki um tíu daga og að því loknu verður hægt að fjarlægja undirslátt og opna fyrir rennsli undir alla brúna. Vegurinn við brúna var rofinn vegna yfirvofandi flóðahættu þann 19. janúar og þar sem hættan er ekki liðin hjá er ekki talið skynsamlegt að fylla strax í skarðið í veginum. Skeiða- og Hrunamannavegur verður því lokaður um sinn við brúna.
Frá þessu er greint í frétt á heimasíðu Vegagerðarinnar.
