Átakinu Römpum upp Ísland var formlega hleypt af stokkunum síðastliðinn föstudag. Markmiðið með verkefninu er að byggja 1.000 rampa um land allt á næstu fjórum árum til þess að auðvelda aðgengi fatlaðs fólks.
Kynningarfundur um verkefnið var haldinn í Skyrgerðinni í Hveragerði á föstudaginn og meðal þeirra sem þar voru staddir var Sigurður Ingi Jóhannsson, innviðaráðherra.
„Verkefnið Römpum upp Ísland er ekki aðeins merkilegt fyrir það að í því felst stórkostleg breyting í aðgengismálum fatlaðs fólks um allt land, heldur er að sérlega ánægjulegt og virðingarvert að einstaklingur leggi svo mikið af orku sinni og fjármunum til verkefna af þessu tagi. Ég vil sérstaklega þakka Haraldi Þorleifssyni fyrir frumkvæðið að samstarfinu og ráðgjafanefnd Jöfnunarsjóðs sveitarfélaga fyrir þá tillögu, sem ég hef staðfest og undirritað og felur í sér 200 milljóna króna stuðning við verkefnið næstu fjögur árin,“ segir Sigurður Ingi.
Römpum upp Reykjavík fékk byr undir báða vængi
Verkefnið Römpum upp Reykjavík, sem snéri að því að byggja 100 rampa í miðbæ Reykjavíkur í fyrra, fékk byr undir báða vængi og var lokið við 101 ramp næstum þremur mánuðum á undan áætlun og á sama tíma undir kostnaðaráætlun. Haraldur Þorleifsson, frumkvöðull verkefnisins, segir að strax hafi verið tekið vel í það.
„Þess vegna færum við út kvíarnar og tæklum allt landið næst. Strax frá byrjun verkefnisins í Reykjavík höfum við fundið fyrir miklum áhuga um allt land og því ákváðum við að slá til. Stuðningsaðilar okkar hafa einnig unnið þrekvirki og þetta væri einfaldlega ekki hægt án þeirra,“ segir Haraldur.
Verkefnið hefst í Hveragerði
Einn af fyrstu römpunum á landsbyggðinni mun rísa innan skamms fyrir utan Matkrána í Hveragerði. Jakob Jakobsson, eigandi veitingastaðarins, segir tilvalið að rampa upp verkefnið þar í bæ.
„Við höfum lengi haldið því fram að Hveragerði sé hliðið inn á Suðurland og því er tilvalið að rampa upp verkefnið hér. Á sama tíma erum við mjög stolt að fá að taka þátt í þessu verðuga verkefni. Aukið aðgengi er öllum í hag. Nú gefst fólki kostur á að sækja þá þjónustu sem það vill án þess að þurfa að hafa áhyggjur af aðgengi. Einnig hjálpar þetta öðrum, svo sem fólki með reiðhjól svo dæmi séu tekin,“ segir Jakob.
