Ásmundur Einar Daðason, félags- og barnamálaráðherra, og Kristófer Tómasson, sveitarstjóri Skeiða- og Gnúpverjahrepps, undirrituðu í gær viljayfirlýsingu um aðkomu stjórnvalda að húsnæðisuppbyggingu í Árnesi.
Fjölga á leiguíbúðum í sveitarfélaginu en mikill skortur hefur verið á húsnæði í Skeiða- og Gnúpverjahreppi um lengri tíma. Fyrsti þáttur verkefnisins felur í sér aðkomu Íbúðalánasjóðs að fjármögnun byggingar á fimm íbúða raðhúsi í Árnesi. Þá verða skoðaðar leiðir til að tryggja aðgengi að hagkvæmum leiguíbúðum til langtímaleigu á svæðinu.
Nauðsynlegt er að byggja nýtt húsnæði á staðnum vegna áætlaðrar íbúafjölgunar í sveitarfélaginu á næstu misserum í tengslum við stórfellda atvinnuuppbyggingu í ferðaþjónustu. Þar munar mest um uppbyggingu Hálendisbaðanna – baðstaðar og hótels í Þjórsárdal.
Íbúðalánasjóður veitir einnar milljóna króna þróunarstyrk
Íbúðalánasjóður mun koma að útfærslu verkefnisins og hefur sjóðurinn ákveðið að leggja sveitarfélaginu til eins milljóna króna styrk til þróunar þess. Styrkurinn er veittur sem hluti af sérstöku tilraunaverkefni sjóðsins, sem snýr að því að örva húsnæðisuppbyggingu utan suðvesturhorns landsins og bregðast við erfiðu ástandi á húsnæðismarkaði, ekki hvað síst á landsbyggðinni.
„Það er ánægjulegt að öflugt fyrirtæki í ferðaþjónustu skuli horfa til samstarfs og uppbyggingar með heimamönnum í Skeiða- og Gnúpverjahreppi. Þessari glæsilegu starfsemi sem fyrirhuguð er í Þjórsárdal fylgir fjöldi fólks, bæði á framkvæmdatíma og að honum loknum, sem mun hafa aðsetur í sveitarfélaginu. Það er mikilvægt að íbúðaskortur hamli ekki uppbyggingu sem tryggja mun atvinnu á svæðinu til langs tíma,“ segir Ásmundur Einar Daðason, félags- og barnamálaráðherra.