Sunnlenska.is, fréttavefur Sunnlendinga, fagnar sjö ára afmæli í dag en vefurinn fór í loftið þann 8. apríl 2010.
Vefurinn fékk frábærar viðtökur strax í upphafi og hefur umferðin um hann aukist ár frá ári. Í dag er svo komið að sunnlenska.is er mest lesni héraðsfréttamiðillinn á Suðurlandi.
Vefurinn er heimsóttur úr öllum heimshornum og á fjölmarga fasta lesendur erlendis t.d. um alla Skandinavíu, í Bandaríkjunum, Bretlandi og á Spáni, en einnig koma reglulegar heimsóknir frá fjarlægari heimshornum eins og Indónesíu, Tælandi, Nýja-Sjálandi og Fiji-eyjum, sé litið til síðustu daga.
Allt frá því vefurinn fór í loftið hefur ritstjórn hans kappkostað að flytja fréttir af öllu Suðurlandi auk þess að fjalla um menningarmál og íþróttir í héraðinu.
Ritstjórn sunnlenska.is þakkar lesendum sínum fyrir skemmtilega og jákvæða samveru á liðnum árum og horfir björtum augum fram á veginn.