Fyrstu fjárréttir á Suðurlandi verða um næstu helgi þegar réttað verður í Fossrétt á Síðu á föstudag og Skaftárrétt á laugardag.
Á sunnudag verður síðan réttað í Haldréttum og Þóristunguréttum á Holtamannaafrétti og mánudaginn 9. september í Fjallrétt við Þórólfsfell.
Stóra réttahelgin í uppsveitum Árnessýslu er 13.-14. september. Á föstudeginum verður réttað í Hrunaréttum og Skaftholtsréttum og á laugardeginum í Tungnaréttum og Reykjaréttum á Skeiðum. Sama dag verður réttað í Heiðarbæjarrétt í Þingvallasveit, Seljalandsréttum undir Eyjafjöllum og í Grafarrétt í Skaftártungu.
Sunnudaginn 15. september er réttað í Brúsastaðarétt í Þingvallasveit og Fljótshlíðarrétt í Fljótshlíð og mánudaginn 16. í Grafningsrétt í Grafningi.
Landréttir við Áfangagil verða fimmtudaginn 19. september og þá helgina verður einnig réttað bæði í Austur- og Vestur-Landeyjum, í Reyðarvatnsréttum á Rangárvöllum, Ölfusrétt í Reykjadal og Selvogsrétt í Selvogi.