Fréttir

Sýslumaður verður á Selfossi og lögreglustjóri á Hvolsvelli

20. júní 2014 1:15

Frá næstu áramótum taka gildi ný lög um umdæmaskipan lögreglustjóra og sýslumanna en með lögunum er embættum sýslumanna fækkað úr tuttugu og fjórum í níu og lögregluumdæmum úr fimmtán í níu.

Þá verður yfirstjórn lögreglu aðskilin frá yfirstjórn sýslumannsembætta. Samkvæmt tillögu úr innanríkisráðuneytinu er lagt til að sýslumaðurinn á Suðurlandi verði staðsettur á Selfossi og lögreglustjórinn á Suðurlandi verði á Hvolsvelli. Þá verður sérstakur lögreglustjóri og sýslumaður í Vestmannaeyjum.

Í dag er Ólafur Helgi Kjartansson, sýslumaður og lögreglustjóri á Selfossi, Kjartan Þorkelsson er sýslumaður og lögreglustjóri á Hvolsvelli og Anna Birna Þráinsdóttir er sýslumaður í Vík. Þá er Karl Gauti Hjaltason sýslumaður og lögreglustjóri í Vestmannaeyjum.

Sveitarstjórn Rangárþings eystra fagnar þeirri ákvörðun innanríkisráðherra að höfuðstöðvar lögreglustjóraembættisins á Suðurlandi verði á Hvolsvelli. Hvolsvöllur sé miðsvæðis á Suðurlandi og byggðalagið vel í sveit sett.

Á fundi sínum síðastliðinn mánudag bókaði sveitarstjórn Rangárþings eystra einnig að hún mælti eindregið með því að Kjartan Þorkelsson verði lögreglustjóri í þessu nýja umdæmi.

„Kjartan […] og starfsmenn embættis hans hafa byggt upp öflugar almannavarnir í samvinnu við viðbragðsaðila og íbúa umdæmis lögreglustjórans á Hvolsvelli. Reyndi verulega á skipulagningu þessara mála í þeim stóru áföllum sem hér urðu á síðustu árum í eldgosunum í Eyjafjallajökli 2010 og Grímsvötnum 2011 svo og við stórflóð í Múlakvísl 2012, sem sýndu svo ekki verður um villst mikilvægi þess að hafa öflugt fólk með víðtæka reynslu á þessu sviði við stjórnvölinn þegar á reynir. Þá hefur Kjartan og hans fólk verið ötult við að byggja upp og styrkja sameinað lögregluembætti í Rangárvallasýslu og Vestur-Skaftafellssýslu,“ segir í bókun sveitarstjórnarinnar.