Lítið sem ekkert öskufall var á Heimalandi við vesturenda Eyjafjalla í dag en strax austur við Ásólfsskála var skyggni komið niður í 70 metra um miðjan dag og í Varmahlíð var skyggnið 100 – 150 metrar.
Um er að ræða sambland af öskufalli og öskufjúki en talsverður strekkingur hefur verið á svæðinu í dag.
Í flugi sérfræðinga með Landhelgisgæslunni eftir hádegi kom í ljós að talsvert gos er í gangi, eldvirkni er enn í þremur gígum sem ennþá virðast vera aðskildir.
Gosmökkurinn rís enn en er lítill og ljós sem bendir til að gjóska sé ekki mikil í honum. Gjóskan úr eldstöðinni virðist hlaðast upp á brúnina og mynda þar hrygg. Kleprar úr sprengingum í gígnum náðu í um 1,5 – 3 km hæð í morgun. Ekkert hraunrennsli var frá gígunum. Sunnar náðu öskuskýin í um 5-6 km hæð. Ekki hægt að merkja hraunrennsli frá gosinu, hvorki til norðurs né suðurs. Hætta á hlaupi er ekki til staðar vegna sírennslis vatns niður jökulinn.
Veðurspá gerir ráð fyrir að vindátt muni breytast á fimmtudag og verða austanstæð en gert er ráð fyrir hægum vindi og rigningu sem dregur verulega úr líkum á öskufalli.
Í dag voru sjö hópar björgunarsveita að störfum á svæðinu, bæði heimamenn og sveitir frá Vesturlandi, Snæfellsnesi og Suðurnesjum. Björgunarsveitarmenn hafa mannað lokunarpósta auk þess að aðstoða við ýmis verkefni, svo sem smölun á búfénaði og önnur tilfallandi verkefni. Bændur hafa verið heimsóttir og virðist staðan hjá þeim nokkuð góð.