Guðlaugur Þór Þórðarson, umhverfis-, orku- og loftslagsráðherra, og landeigendur jarðarinnar Heiði í Skaftárhreppi, Hveraberg ehf., hafa gert með sér tímamótasamning sem kveður á um samstarf um verndun Fjarðárgljúfurs í Skaftárhreppi og uppbyggingu innviða þar.
Samningurinn er frekari útfærsla á því samkomulagi sem ráðherra og landeigendur gerðu með sér í júní 2022 þegar Hveraberg keypti jörðina og fól í sér að ráðuneytið og landeigendur muni í sameiningu vinna að verndun og friðlýsingu Fjaðrárgljúfurs.
Vinsældir svæðisins eru miklar og hafa aukist mjög á síðari árum. Fjöldi þeirra sem sækja staðinn heim hefur jafnvel leitt til þess að loka hefur þurft svæðinu tímabundið vegna ágangs.
Taka við verkefnum varðandi verndun og landvörslu
Samkvæmt samningnum tekur Hveraberg við verkefnum er varða verndun náttúru og landvörslu á svæðinu, ásamt umsjón, viðhaldi og rekstri innviða og þjónustu. Félagið mun auk þess byggja upp ýmsa þjónustu við ferðamenn sem sækja staðinn heim eins og t.d. snyrtingar og gestaaðstöðu og mun innheimta bílastæðagjöld til að standa fyrir uppbyggingu og rekstri. Í samræmi við reglur náttúruverndarlaga um almannarétt verður þeim sem ekki þurfa að nýta bílastæðið þó áfram heimilt að fara um svæðið án gjaldtöku og njóta þar náttúrunnar.
Ánægjulegur áfangi
„Það er gríðarlega jákvætt að hafa náð þessum áfanga með ríkinu og erum við mjög ánægðir með samstarf okkar með yfirvöldum og sveitarfélaginu ásamt öðrum hagsmunaðilum. Við erum mjög spenntir að hefja uppbyggingu á þessu einstaka svæði þar sem áherslan verður á verndun náttúru og góða upplifun ferðamanna og annara gesta,“ segir Brynjólfur J. Baldursson, stjórnarformaður HB Heiði ehf. og Hverabergs ehf.
Guðlaugur Þór tekur undir þetta og segir einstaklega ánægjulegt að þetta tímamóta samkomulag hafi náðst. „Það á líka að vera eðlilegt að ríki og landeigendur geti í sameiningu staðið að uppbyggingu og verndun á náttúruperlum sem ferðamenn njóta þess að heimsækja,“ segir Guðlaugur Þór.
Friðlýsingarferli lýkur á þessu ári
Nú er unnið að friðlýsingu svæðisins af hálfu Umhverfisstofnunar, í samstarfi við landeigendur Heiðar og annarra jarða sem eiga land að gljúfrinu, sem og aðra hagsmunaaðila. Stefnt er að því að friðlýsingarferli ljúki á þessu ári en þegar Fjaðrárgljúfur hefur verið friðlýst mun ríkið falla frá kauprétti jarðarinnar sem gert var ráð fyrir í samningi aðila frá 2022.
