Bæjarráð Árborgar samþykkti á fundi sínum í morgun viðbótarfjárveitingu upp á rúmar 10 milljónir króna til atvinnuátaks fyrir ungmenni á aldrinum 17-20 ára í sveitarfélaginu.
Ætlunin er að verja fjárhæðinni til ráðningar ungmenna í fjölbreytt sumarstörf hjá sveitarfélaginu og var kostnaðinum, 10,2 milljónum króna vísað til viðauka við fjárhagsáætlun. Störfin sem skapast af þessu eru í kringum fimmtán talsins auk verkstjóra.
Eggert Valur Guðmundsson, fulltrúi minnihlutans í bæjarráði, studdi málið einnig en tillagan að þessu verkefni kom frá Braga Bjarnasyni, menningar- og frístundafulltrúa, Guðlaugu Jónu Hilmarsdóttur, félagsmálastjóra og Jóni Tryggva Guðmundssyni, yfirmanni framkvæmdasviðs. Eggert lét bóka að hann fagnaði tillögunni og því frumkvæði sem sviðsstjórar sveitarfélagsins sýndu með henni.