Tvö ný kórónuveirusmit hafa komið upp í Vallaskóla á Selfossi eftir að nemandi í 7. bekk greindist með COVID-19 í síðustu viku.
Í kjölfarið fóru allir nemendur í viðkomandi bekk, umsjónarkennari og stuðningsfulltrúi í sóttkví. Í samráði við lækni á Heilbrigðisstofnun Suðurlands var síðan ákveðið að allir í bekknum færu í sýnatöku og leiddi hún í ljós tvö ný smit.
Að sögn Guðbjarts Ólasonar, skólastjóra, vinnur smitrakningateymi sóttvarnalæknis hörðum höndum að því að finna upptökin að smitunum en nánari upplýsingar um það liggja ekki fyrir að svo stöddu.
Guðbjartur segir í tilkynningu á vef skólans að þeir sem eru að hugleiða hvort þeir eigi að fara í sýnatöku eigi ekki að hika við að óska eftir því. Þá er einfaldast að hafa samband í síma 1700 eða beint við HSu. Fyrir þessu er lágur þröskuldur að sögn læknis á HSu.
„Fulltrúar heilsugæslu og rakningarteymisins hafa sagt að þar sem smit hafi komið upp í sóttkví eigi ekki að breyta neinu í viðbrögðum skólans sem stendur. Staðan er því tekin frá degi til dags. Við vonum að það takist að ná utan um þessa sýkingu en það brýnir okkur í smitgáttinni; halda fjarlægð, þvo og spritta hendur vel. Við minnum líka á upphaflegu tilkynningu okkar í skólabyrjun að foreldrar sem koma inn í skólabyggingar á skólatíma þurfa að vera með grímu og hanska. Enn fremur að senda nemendur ekki í skólann ef þeir sýna flensueinkenni,“ segir Guðbjartur ennfremur.