Viðbragðsaðilar á Suðurlandi eru nú á leið á vettvang umferðarslyss á Biskupstunganbraut við Myrkholt.
Fimmtán einstaklingar eru sagðir aðilar að slysinu samkvæmt fyrstu tilkynningu og eru fjórir taldir slasaðir en þó ekki alvarlega.
Mikill viðbúnaður var hjá viðbragðsaðilum vegna slyssins en læknir er á vettvangi og að auki er aðstoð frá nærliggjandi stöðum að berast á vettvang.
Ljóst er að verkefni þetta mun taka einhverja stund í vinnslu og verða frekari upplýsingar veittar þegar þær liggja fyrir.
Uppfært 17:30
Slysið virðist, við fyrstu sýn, hafa orðið með þeim hætti að tveimur bifreiðum sem komu úr gagnstæðri átt var ekið framan á hvora aðra. Meiðsli eru ekki jafn alvarleg og talið var í fyrstu en alls voru 13 einstaklingar í bifreiðunum, allt erlendir ferðamenn. Þrír einstaklingar, sem eru með alvarlegustu meiðslin, verða fluttir á Bráðamóttöku Landspítalans með þyrlu Landhelgisgæslunnar. 10 einstaklingar verða fluttir til aðhlynningar á bráðamóttöku Heilbrigðisstofnunar Suðurlands (HSU) á Selfossi. Mikil ísing er nú á vettvangi og biður lögregla vegfarendur um að fara með gát og sýna viðbragðsaðilum tillitssemi við vinnu sína. Lögreglan á Selfossi rannsakar tildrög slyssins.