Þjóðskrá Íslands hefur aftur endurmetið niðurstöður undirskriftasöfnunar og í gær fengust nýjar tölur um fjölda undirskrifta.
Starfsmenn Þjóðskrár Íslands komust að því að sumir einstaklingar höfðu verið tvítaldir þar eð nöfn þeirra voru á báðum listunum þ.e.a.s. rafrænu- og pappírslistunum.
„Þetta endurmat leiddi til þess að nákvæmlega sami fjöldi kjósenda í Árborg vildi fá að kasta atkvæði sínu á nýsamþykkt aðal- og deiliskipulag eða 2.086 einstaklingar sem er 31,8% af kjósendum Árborgar,“ segir í tilkynningu frá forráðamönnum undirskriftarsöfnunarinnar. Alls þurftu 1.909 manns að skrifa undir listana til að knýja fram kosningu þannig að fjöldi undirskrifta er 10% hærra hlutfall en nauðsynlegt er til að framkvæma kosningu.
Þjóðskrá Íslands hefur opnað fyrir gátt hjá sér þannig að allir þeir sem eru með gilda undirskrift á undirskriftalitunum hafa fengið póst um það í pósthólf sitt á mínum síðum á Ísland.is hjá Þjóðskrá Íslands. Til að nálgast tilkynninguna þarf að auðkenna sig með Íslykli eða rafrænum skilríkjum.
„Undirskriftalistarnir hafa eðlilega verið hjá Þjóðskrá Íslands þar sem starfmenn hennar hafa verið að endurmeta fjölda lögmætra undirskrifta. Það er á vegum Persónuverndar hvernig sveitarfélög mega meðhöndla þessa undirskriftalista. Varðandi þetta atriði höfum við sent fyrirspurn til Persónuverndar og er sú niðurstaða liggur fyrir verður ekkert því til fyrirstöðu að afhenda listana framkvæmdastjóra bæjarstjórnar,“ segir í tilkynningunni frá forráðamönnum undirskriftasöfnunar í Árborg.