Orkuveita Reykjavíkur hefur gert samning við Bláskógaveitu um að tengjast vatnsveitu Úthlíðar til að bregðast við vatnsskorti vegna lágrar vatnsstöðu í lind í Bjarnarfelli.
Eins og Sunnlenska greindi frá um síðustu helgi eru vatnslindir í Bjarnarfelli nær uppþornaðar vegna langvarandi þurrka.
Að undanförnu hefur verið unnið að samtengingu veitnanna og er áformað að því verki ljúki á næstu dögum.
Í tilkynningu frá OR eru ástæður vatnsskortsins raktar en síðasti vetur var afar snjóléttur og því á litlum forða að byggja fyrir kaldavatnslindina í Bjarnarfelli sem er forðabúr vatnsveitunnar. Hins vegar hefur úrkoma á svæðinu verið með minnsta móti í vor og sumar.
Til þess að bregðast við þessu hefur OR samið um að tengjast vatnsveitu Bláskógabyggðar í Austurhlíð og er sú tenging komin á. Til þess að tryggja eins og kostur er nægjanlegt framboð af vatni í Úthlíð þarf að auka þrýsting með því að koma fyrir nýrri dælu á lögninni sem krefst þess að komið verði fyrir dæluhúsi auk heimtaugar frá Rarik sem flytur rafmagn sem knýr dæluna. Nú sér fyrir endann á þessum framkvæmdum og búast má við að viðunandi vatnsframboð með nægjanlegum þrýstingi verði komið á Úthlíðarveitu á næstu dögum.