Varðskipið Þór er væntanlegt til Þorlákshafnar á morgun, laugardaginn 27. október, og er áætlað að skipið verði þar opið til sýnis frá kl. 13-16.
Landhelgisgæslan hvetur fólk til að koma um borð og skoða hið glæsilega varðskip sem er bylting í vöktun, öryggismálum, leit og björgun innan íslenska hafsvæðisins.
Að öllu jöfnu eru 18 manns í áhöfn skipsins sem er sami fjöldi og á varðskipunum Ægir og Týr. Á meðal verkefna sem skipinu er ætlað að sinna eru: eftirlit- og löggæsla á hafinu, fiskveiðieftirlit, leit og björgun, dráttarverkefni, slökkvistörf, mengunarhreinsun og sjómælingar. Þyrlur Landhelgisgæslunnar geta tekið eldsneyti á flugi yfir varðskipinu og hægt er að gera Þór að fljótandi stjórnstöð í almannavarnaaðgerðum.