Samkvæmt upplýsingum frá Veðurstofu Íslands mun úrkomubelti fara hægt austur yfir landið í nótt. Varað er við vatnavöxtum umhverfis Eyjafjallajökul.
Búast má við mikilli úrkomu í hlíðum Eyjafjallajökuls og við það skapast hætta á vatnavöxtum í ám umhverfis jökulinn og er sérstaklega varað við leiðinni inn í Þórsmörk. Síðla nætur og til morguns er aukin hætta á aurskriðum niður suðurhlíðar jökulsins. Reikna má með að úrkomutímabilið standi frá kl. 22:00 í kvöld og til hádegis á morgun, föstudaginn langa.
Náið er fylgst með stöðu mála og Lögreglan á Hvolsvelli hvetur íbúa, sem og vegfarendur til að fara varlega og fylgjast með fréttum af veðri og færð á vefsíðum Veðurstofu Íslands og Vegagerðarinnar, www.vedur.is og www.vegagerdin.is