Ekki er hægt að segja hvort Skaftárhlaupið hafi náð hámarki við Sveinstind en frá því í morgun hefur vatnshæð staðið í stað þar í nokkrar klukkustundir.
Enn er of snemmt er að segja til um hvort hámarkinu sé náð þar. Í tilkynningu frá Veðurstofunni segir að ekki sé búist við að hlaupið verði stórt en vegfarendur eru beðnir um að halda sig frá upptökum árinnar og lægðum í landslagi vegna gasmengunar. Flætt gæti yfir fjallavegi í Skaftárdal.
Brennisteinsvetnismengun getur gætt þar sem hlaupvatn kemur undan jökli og getur skaðað slímhúð í öndunarfærum og augum auk þess sem árnar geta flætt yfir bakka og vegi sem liggja þeim nærri. Ferðafólki er eindregið ráðlagt að halda sig fjarri farvegi Skaftár ofan Skaftárdals svo og jöðrum Skaftárjökuls, Tungnárjökuls og Síðujökuls á meðan hlaupið stendur yfir.
Ríkislögreglustjóri í samráði við lögreglustjórann á Suðurlandi lýstu í gær yfir óvissustigi almannavarna vegna Skaftárhlaups. Óvissustig þýðir að aukið eftirlit er haft með atburðarás sem á síðari stigum gæti leitt til þess að heilsu og öryggi fólks, umhverfis eða byggðar verði ógnað. Að lýsa yfir óvissustigi er hluti af verkferlum í skipulagi almannavarna til að tryggja formleg samskipti og upplýsingagjöf á milli viðbragðsaðila.